İlk lənət

İlk baxışda bu bir doğum səhnəsi kimi görünür; təmiz, ümid daşıyan, müqəddəs. Amma yaxınlaşdıqca, işığın arxasında gizlənən bir çürümənin qoxusu gəlir insana. Ana, körpəsini qucağına almış; sanki dünya dayanmış, hər şey susmush kimi. Amma səssizlik rahatlıqdan deyil; basıdırılmış bir qışqırığın qalıqlarıdır. Arxa plandakı siluetlər... İnsanlıqdan geriyə yalnız şəkil qalmış, artıq xatırlanmayan adlar kimi oradalar. Bir zamanlar sevməyi bilən ürəklər idi bəlkə amma indi Tanrının belə üz döndərdiyi, cəzalandırılmış, unudulmuş, lənətlənmiş ruhlara çevrilmişlər. Tanrının lənətlədiyi aciz ruhlar, sonsuz əzabın içində əriyir... Ana, hər şeyin fərqindədir. Südü ilə birlikdə qorxularını da verir körpəsinə. Sevgi ilə sarıyır amma içində daşıdığı sarsılmaz qorxunu gizləyə bilmir. Bəlkə də bilir... Bu körpə bir gün böyüyəcək, gözlərindəki işıq sönməyə başlayacaq və o da öz qaranlığına qarışacaq. Çünki bəzən ən məsum görünən əllər, ən böyük qaranlığı gözləyir. Məsumluq, qaranlığın hamiləsidir. Və əzabın ən təmiz halı, ümidlə başlayır. Şərlik həmişə bir kölgə kimi gözləyir. Və bir gün, "yaxşı" sandığın hər kəs səni yaralayır. Ən müqəddəs bildiklərin, səni ən çox unudanlar olur. Bir ananın ürəyi belə zamanla daşlaşa bilər, bir məsumun gülüşü belə bir qışqırığa çevrilə bilər. Bu rəsm bir doğum deyil. Bir lənətin səssiz əks-sədasıdır.

• Şəkil Növü: Yağlı Boya
• İl: 2025
• Üslub: Sürrealizm
• Mövzu: Fiqur
• Səth: Kətan Tuval
• Ölçülər: Genişlik: 70 × Yüksəklik: 100 × Dərinlik: 3
• İstiqamət: Şaquli/Portret
• Çərçivə: Çərçivəsiz
• Rəng Paleti: Çox Rəngli
• Texniki: Fırça Texnikası, Spatula/Bıçaq, Nöqtəçilik, Sıçratma/Damcılatma
• Son Mərtəbə: Laklı
• İmza: İmzalanmış
• Vəziyyət: Mükəmməl
• Orijinallıq: Orijinal
• Nəşr: Nəşr Nömrəsi: 1\1